Cagayan de Oro – Nagbunga ang sakripisyo ug kahago sa mga batan-ong basketbolista sa Team Cagayan de Oro Higalas human naangkon ang kampeonato sa 21-under division sa bag-ohay natapos nga National Basketball League Finals niadtong Oktubre 17-21 ning tuig sa Manolo Fortich Gymnasium, Manolo Fortich, Bukidnon.
Adunay 12 ka mga teams gikan sa tibuok nasod ang mi-qualify sa maong torneyo human sa qualifying tournaments nga gipahigayon sa Luzon, Visayas ug Mindanao.
Dako ang pasalamat sa mga magdudula ug coaching staff sa hugot nga suporta ni Mayor Rolando “Klarex” Uy pinaagi sa buhatan sa Cagayan de Oro City Sports Development Office ubos ni Mr. Romarey Gorro.
Kini nga kampeonato nagsimbolo sa kakugi ug paningkamot sa atong mga magdudula ug coaches sa ilang tinguha pag-representar sa dakbayan ug maipakita ang ilang mga katakus ug abilidad sa usa ka nasyonal nga kompetisyon, sigun pa ni Gorro.
News written by Cagayan de Oro City Information Office
Photo by Cagayan de Oro City Sports Development Office