Cebu City – Gimando sa Philippine Coast Guard o PCG-Cebu ang pagpa suspenso sa tanang biyahe sa barko paingon sa mga dapit nga maigo sa bagyong Quinta.
Segun sa giluwatang notisya gahapon, si Acting Commander Alvin Dagalea sa PCG-Cebu miingon nga ang giluwatan nilang order mo epekto dihadiha.
Suma pa sa notice, tungod sa pagpaubos sa signal no. 1 ug 2 sa mga dapit sa Luzon ug Visayas nga apektado sa bagyong Quinta, nahukman sa coast guard ang pagsuspenso sa byahe sa tanang matang sa barko aron kalikayan ang aksidente sa dagat.
Ang mga biyahe nga paingon ug moagi sa mga probinsiya sa Catanduanes, Camarines Norte, Camarines Sur, Marinduque, Albay, Batangas, Sorsogon, Oriental Mindoro, Romblon, ug Northern Samar nga ubossa signal no. 2 gipugngan paglawig.
Apil usab sa gisuspenso ang mga biyahe sa Masbate, Quezon, Cavite, Bulacan, Occidental Mindoro, Bataan, habagatang bahin sa Zambales, Metro Manila, Easter Samar, amihanang bahin sa Capiz, ug Antique nga ubos sa signal no. 1.
Matod ni Dagalea, ilibkas lang ang suspensiyon kon mobalik na sa maayong kahimtang ang panahon.
Midugang si Dagalea nga kadtong barko nga gusto lang mopahipi sa kaislahan, gitugotan pagbyahe basta dunay written request ug walay pasaherong mosakay. (Jhon Tadlip/JTY)
(Source & Photo: Coast Guard Station Central Cebu)