Tagmandar nan kagamhanang lokal nan Ciudad Surigao pinaagi na kan Atty. Manuelito Delani an pagpahunong sa operasyon nan Mario’s Resto Bar sa dayan Borromeo, Barangay Washington, Ciudad Surigao sugod kahapon na adlaw Hulyo 16, 2020 tungod sa matud pa paglapas sa polisia partikular sa Social Distancing sanan iban pa na protocols para sa pag ikay na magtapon sa CoViD-19.
Sumaya sa tag-ija nan establismento na si Mario Laurente na human sa pipila ka buyan na wayay operasyon tungod sa community quarantine, nag abri sila nan jadton miagi na adlaw Hulyo 15, 2020 gikan alas 10 sa buntag hangtud alas 11 nan duyom, kun diin para sa ila nasubay nila an mandato sa mga protocols kontra CoViD-19.
Tagsulti isab nan ini na sa ila pagtoo waya mapasó an ila business permit, tinuod matud pa na waya sila makabayad para sa second quarter kuman na tuig tungod kay nagtoo sila na kun nuhatag nan konsiderasyon an BIR, an SURNECO, bisan an SMWD, para sa muratorium sa mga bayrunon, labaw na muhatag nan ini na konsiderasyon an kagamhanan nan ciudad.
Hinuon tagklaro ni Laurente na ila tumanon an mandar nan kagamhanan nan ciudad na ila hunungon an ila operasyon, dungan sa pag-ampo na katugutan ra sila pag-abri o pag-operate human nan pipila ka adlaw, labi na kay matud pa kun may ila man kalapasan sa social distancing sa jadton pag abri nila, ini una na pa nila na higayon nga nakalapas. (Jhino Parrucho, Ronda 10 | Shela Salar, Ronda 5 RPN DXKS)
Â