Cebu City – Wala gihapoy kausaban ang swabbing policy sa mga mangabot nga mga Returning Overseas Filipinos (ROF) ug Overseas Filipino Workers (OFW) sa Sugbo, taliwa sa pagsiguro sa nasudnong kagamhanan nga ipatuman ang palisiya sa IATF.
Usa ka adlaw gikan sa pagpahibawo sa Malacañang nga gimando ni Presidente Rodrigo Duterte sa probinsiya ang pagsunod sa protocols sa inter-agency task force, ang kadagkoan sa lalawigan nagkauyon nga ipadayon ang Swab-Upon-Arrival policy.
Nagtagbo ang mga Stakeholders uban kang Gob. Gwendolyn Garcia para pagtuki sa maong butang.
Lakip sa nanambong ang mga labaw ug representante sa mga ahensiya sa Central Visayas sama sa Department of Health (DOH-7), Bureau of Quarantine, Department of Interior and Local Government (DILG-7), ug mga airport executives gikan sa MCIAA ug GMCAC.
Si Dr. Mary Jean Loreche, tigpamaba sa DOH-7, mipahibawo sa mga tigbalita human sa miting nga ipatuman gihapon nila ang baroganan sa Kapitolyo sa swabbing sa mga ROF ug OFW.
Gihimug-atan ni Loreche nga ang local nga mga opisyal mosunod sa Provincial Ordinance No. 2021-04, nga nagmando nga i-swab dayon ang mangabot sa airport nga mga pasahero gikan sa abroad nga taga Sugbo ug dili sa ikapito nga adlaw pa. (Jhon Tadlip/JTY)
(News & photos courtesy of Cebu Provincial Government | Department of Health-7)