Personal nga gitunol ni PHIVIDEC Administrator Pompee La Viña ang suportang pinansyal alang sa pamilya sa unom ka mga sundalo nga namatay human mihagsa ang ilang gisakyang C-130 Hercules Airforce plane didto sa airport sa Jolo, Probinsya sa Sulu.
Kini gitunol sa administrador atol sa iyang pagbisita sa haya sa unom ka mga fallen soldiers sa 4th ID Camp Evangelista Patag, ning dakbayan sa Cagayan de Oro kagahapong adlawa.
Ang unom ka mga patayng lawas nga gihaya sa 4th ID mao silang (1.) Sgt. Butch D. Maestro (Inf) PA sa Balingoan MisOr., (2.) Pvt. Vic. A. Monera (Inf) PA sa Dagombaan, Bukidnon, (3.) Pvt. Raymar C. Carmona (Inf) PA sa Agusan del Norte, (4.) Pvt. Mel Mark L. Angana (Inf) PA sa Malaybalay, Bukidnon, (5.) Pvt. Mark Nash P. Lumanta (Inf) PA sa Dagombaan, Bukidnon, ug (6.) Pvt. Marcelino H. Alquisar (Inf) PA sa Impasug-ong, Bukidnon.
Dinhi gipahibalo ni La Viña ang mga benepisyong giandam sa PHIVIDEC Industrial Authority alang sa pamilya sa unom ka mga fallen soldiers sama sa paghatag og scholarship program gikan sa TESDA lakip na ang libreng edukasyon sa USTP Villanueva Campus.
Gipahibalo usab ni La Vina sa mga kabanay nga prayoridad sa PHIVIDEC ang paghatag og trabaho sa mga anak sa mga sundalong namatay atol sa maong insidente.
Samtang, Mainiton usab nga gihimamat ni 4th Infantry Diamond Division Commander Major General Romeo Brawner Jr. si administrador La Viña ug nagkahiusa ang duha alang sa planong bag-ong hospital sa 4th ID kung asa ipahimutang ang Veterans Wing.
Mahinumduman nga mihangyo ang 4th ID ngadto sa PHIVIDEC alang sa mga kagamitan sama sa hospital beds para sa ilang bag-ong hospital.
Gipaabot pa ni La Vina kang Gen. Brawner nga kanunay’ng abli ang PHIVIDEC ubos sa iyang pangatungdanan sa pagtabang sa mga sundalo ug giaghat niini ang pagpahimutang sa mga nag-unang kahimanang medical sama sa Diagnostic Equipment ug uban pang mga gikinahanglang ekipo sa Hospital.
Gani sa wala pa nahitabo ang pagkahagsa sa eroplano, aprubado na ni La Vina ang pondo alang sa pagpalit og mga hospital equipment para sa Veterans Memorial Medical Center (VMMC) didto sa kaulohan.
Boot usab ni La Viña nga mahuman na sa labing daling panahon ang bag-ong hospital sa 4th ID kung asa ipahimutang ang Veterans Wing aron mas mapadali ang paghatag og medical attention sa mga beterano, retirado ug mga sundalo lakip ma ang ilang mga kabanay isip mga benipisyaryo ug dili na kinahanglan pang muadto sa VMMC.
(Source: Phividec Industrial Authority Office)