CAGAYAN DE ORO CITY- Moabot sa 36 ka mga locally stranded individuals (LSIs) ang gipapuyo karon sa holding area sa University of Science and Technology of Southern Philippines (USTP) sukad kagahapon, Hunyo 16 matud pa ni Emergency Operations Center head Dr. Lorraine Nery.
Dugang 34 ka mga LSIs ang gituhuang mahidangat pa sa mosunod nga mga adlaw.
Ang USTP nagsilbi kini nga temporary holding area alang sa mga inbound LSIs nga nagpaabot pa sa ilang transport assistance gikan sa nagkalain-laing government units. Si Mayor Moreno sa syudad sa Cagayan de Oro nagpasalamat sa Regional Interagency Task Force sa pag-accommodate sa mga stranded individuals samtang nagpaabot pa sa ilang pagtransfer.
Sukad niadtong Marso 30 hangtud Hunyo 15, ang Emergency Operations Center nakarecord sa 1,380 ka mga returning overseas Filipino workers ug LSIs, diin 300 niini ang mipailawom sa 14 days nga kwarentina.
Sa 300 ka mga indibidwal, 186 niini ang naghome quarantine, 113 ang anaa sa walo ka isolation units sa Cagayan de Oro ug usa ang anaa sa barangay isolation unit.