Davao City – Malampusong nadakpan ang 9 ka mga indibidwal nga mga sakop matud pa sa “Escudero Criminal Group” human sa gikasang drug operation sa hiniusang pwersa sa otoridad alas 8:00 sa kagab-ihon kagahapon didto sa Maharlika Highway, Km 25 Bunawan, Davao City.
Giila sa kapolisan ang mga dinakpan nga sila si Ronald Flores Duno, Alden Flores Duno, Benito Cedeno, Ramil Gomez Pioquinto, Richard Beldia, Jay Sultan Tan, Christian Dominggo Rivas, Garry Caballo, Louie Roxa Larazabal nga pulos myembro sa maong grupo nga responsable matud pa gun for hire, gun running ug operasyon sa iligal nga droga didto sa Davao del Norte, Compostela Valley ug ubang kasikbit nga mga lugar sa Davao Region.
Atol sa operasyon nakuha gikan kanila ang duha ka dagkong pakete dunay unod gitahapang shabu, 2 ka medium ug usa ka small size sachet, mga armas nga gilangkuban sa usa ka unit sa .40 caliber pistol dunay walo ka bala; 40 live ammos; 1 unit sa .9mm caliber pistol unod ang katorse ka bala; usa ka unit sa 45 caliber revolver dunay lima ka bala; usa ka .38 caliber revolver ; mga bala sa 45 pistola; (1) unit sa multi caliber suppressor.
Lakip narekober sa operasyon ang mga sakyanang gisakyan sa mga nasampit nga gilangkuban sa usa ka Toyota Fortuner, color puti nga dunay plakang LGG 717; Nissan NAVARA, color orange nagtangag sa plate number FO Q853; ug usa ka binugkos nga paper bill samtang mga dinakpan ang gibalhog na karun sa Bunawan PNP alang sa dugang imbestigasyon.
Ang nasampit nga operasyon giupangunahan sa Criminal Investigation and Detection Davao City Field Unit gipanguluhan ni PCI MILGRACE C. DRIZ kauban ang mga personahe sa PDEA 11 ug Bunawan PNP alayon sa Oplan Paglalansag Omega ug Omnibus Election Code.