Gisugdan na sa pagpanghatag ang Singko Mil ka pesos (P5K) nga ayudang pinansyal alang sa matag kwalipikado nga rice farmer sa probinsya sa Sarangani. Unang nakadawat ang mga taga-Alabel atong adlaw nga Hwebes.
Ug kagahapong adlawa, adlaw nga Dominggo, natigayon ang pagpanghatag sa lungsod sa Malungon kuyog si Malungon Mayor Tessa Constantino.
Segun ni Ms. Jocelyn Misterio, ang agriculture program coordinating officer sa Sarangani ug Gensan (APCO SarGen) ilalum sa buhatan sa Department of Agriculture, mulibot ang ilang opisina sa pito (7) ka munisipyo sa Sarangani Province kauban ang LBP/DBP aron ipang-apud apod ang maong ayuda ubos sa programa nga Rice Farmers Financial Assistance (RFFA).
Ang mga benipisyaryo ang rekomendado sa ilang municipal agriculture office human nga na-rehistro sila sa RSBSA kon Registry System for Basic Sectors in Agriculture, kadtong dili dagko ang giugmad nga yuta.
Mapasalamaton si Misterio ngadto kang Governor Steve Chiongbian Solon tungod sa maayong koordinasyon sa LGU Sarangani ug sa Department of Agriculture pinaagi sa Sarangani Provincial Agriculture Office gidumalahan ni Provincial Agriculturist Jonathan Duhaylungsod, hilabi na ang mga gatanum og palay nga apektado dili lang sa mga lockdown nga gipatuman tungod sa Coronavirus global pandemic kundili sa pag-ubos sa presyo sa palit gumikan sa pagtugot sa balaod nga Rice Tariffication nga makasulod sa mga palengke ang mga imported rice gikan sa ubang mga nasud.
Una ng nibisita si DA 12 Regional Director Arlan Mangelen niaging bulan sa Mayo sulod mismo sa Kapitolyo sa Sarangani nakigpulong atubangan nila Governor Solon, Vice Governor Elmer De Peralta, Board Member Arman Guili ug sa pito (7) ka mayor dala ang mga maayong kaayuhan sa agriculture sector, sa pagsuporta kana nila Senador Manny ug Congressman Ruel Pacquiao.
Nadawat na sa mga mag-uuma sa Sarangani Province ang programa sa Department of Agriculture sa pamunuan nila Agriculture Secretary William Dar ug Pangulong Rodrigo Duterte nga mga sinakong semilya sa OPV puting mais/humay/gulay, dungan sa mga pag-ulan ulan nga nasinatian, lakip na ang mga pato (Muscovy duck) ug kanding.
Dakong kalipay hilabi na sa mga mag-uuma nga anaa sa mga upland barangay nasulod sa SAAD kon Special Area for Agricultural Development.
Sa tibuok Sarangani, anaa sa pasiuna nga hapit tres mil (<3K) kabuok rice farmers ang maka-benipisyo sa Singko Mil ka pesos nga Rice Farmers Financial Assistance.
Matud pa ni Misterio, may nauna silang gipanghatag nga ayudang pinansyal sa mga mag-uuma tag-Kinse mil ka pesos (P15K) kada benipisyaryo.
Usa kadto ka pautang nga pagabayaran sulod sa tulo (3) ka tuig nga zero ang interest ilalum sa programa sa DA nga SURE Aid o Expanded Survival and Recovery Assistance Program for Rice Farmers.
Apan kining Singko Mil ka pesos nga Rice Farmers Financial Assistance ang grant nga wala nay bayaran ang mag-uuma.
Sa panahon karon sa ting-ulan, nagpahimangno na lamang si Sarangani PDRRMO Officer Mr. Rene Punzalan nga magbinantayon.
Nakasinati og mga pag-overflow sa tubig-baha niaging mga adlaw ang mga sapa sa mga lugar sa Kiamba ug Maitum.
Hinuon walay mga casualty sa tao ang napagan. Dili lang magkumpyansa matud pa bisan pinisik sa mga bagyo ra ang matagamtaman sa Sarangani Province ug sa mga localized thunderstorm gumikan gadala gihapon kini og hulga sa mga pagbaha, landslide ug pagdako sa mga balod sa kadagatan.