Usa ka 7 anyos nga batang lalaki ang uwahing survivor o naulian sa pagtapot sa coronavirus disease o Covid 19 sa dakbayan sa Lapulapu.
Gi-release o gipagawas sa ARC Hospital sa brgy. Agus sa miaging gabii ang bata ug gipapuli na sa ilang balay sa brgy. Gun-ob.
Sa post sa iyang Facebook, si Nagiel Bañacia, pangu sa CDRRMO o City Disaster Risk Reductio Management Office, mitug-an nga ilang giabiabi ang bata paggawas sa ospital.
Gani, gihulagway pa ni Banacia nga bayani ang bata nga naka-survive sa virus.
Hinuon, gitataw ni Bañacia nga ang inahan ug igsoon sa 7 anyos nagpabilin pa sa tambalanan, padayong nakigbisog sa impeksyon.
Naglaom siya nga aduna pay maulian sa mga pasyente sa Covid 19 sa umaabot nga mga adlaw.
Sa nasayran, miabot na og 41 ang ihap sa mga nataptan sa virus sa Lapulapu human madugangi og usa gahapon.