Siargao, Surigao Del Norte Nangandam Na Sa Regional Sports Competition

Siargao, Surigao Del Norte Nangandam Na Sa Regional Sports Competition

by RPN
27 views

Gipangandaman na ang umaabot na 23rd Caraga Athletic Association Regional Sports Competition 2020 Island Games nga unang pagahimoon sa Isla sa Siargao karon umaabot nga Marso 7-14 ning tuiga.

Sa gipahigayon nga tigom sa Local School Board kagahapon nga adlaw Enero 8, 2020 sa PGO Conference Hall nga gipangunahan mismo ni Gov. Francisco Lalo Matugas, gihisgutan ang lainlaing komitiba alang sa pagpangandam sa maong kompetisyon sama sa mga kometiba sa Finance, Invitations, Souvenirs, Programs, Transportation, Billeting, Foods and Beverages, Security, Publicity and Media Communications, Reception, Accommodation, Light and Sounds ug uban pa.

Gipresentar ni Schools Division Superintendent Nelia Lomocso sa Siargao Division ang mga Billeting Quarters sama sa Dapa, General Luna, Del Carmen, Pilar ug San Isidro para sa 12 ka mga delegasyon sa tibook rehiyon sa Caraga diin gihisgutan ang mga kinahanglanon sama sa supply sa tubig, transportasyon, pagkaon ug uban pa.

Gipasalig sa Bureau of Fire nga adunay 7 ka mga firetrucks ang mag supply sa tubig sa mga Billeting Quarters ug gipasalig usab sa Siargao Water District nga igo ang supply sa tubig sa matag adlaw nga panginahanglan sa mga partisipante.

Mihatag usab ug suporta ang mga mayor sa maong Isla sama na ni Mayor Proserfina Coro sa Del Carmen ug Mayor Lamberto Domiños sa San Isidro nga nakatambong sa maong tigom.

Gibutyag ni Gov. Lalo nga imbitado ang atong Presidente sa Pilipinas Pres. Rodrigo Duterte sa maong higayon ug giandam na ang invitation letter sa tabang ni Cong. Angel Amante-Matba.

Gilaumang moabot sa 8,000 ka mga delegado ang modagsa sa Isla sa Siargao sa maong higayon. – (MaryJul Espuerta – PIC)

0 comment

Related Posts