Patay an isa ka senior citizen human nadasmagan sa isa ka Mitsubishi Utility Vehicle nga may plate no. GAA 4791 nga nakarehistro kay Edgar C. Galvante sa Vintage Vision Int’l. Inc. ug gimaneho ni ALFREDO ESCABAL OLOJAN, 60 anyos, menyo, may drivers license, residente sa Brgy. Azucena, Taganaan, Surigao del Norte.
Nakilay-an an biktima nga si LUCRESIO SANCHEZ EMBOY, 70 anyos, residente sa Purok 2, Brgy. San Pablo, Sison.
Nahitabo an disgrasya sa alas 11:00 an takna sa gabie niadtong adlaw’ng Lunes, Septyembre 14, 2020 sa National Highway sa Purok 3, Brgy. San Pablo, Sison, Surigao del Norte.
Sa imbestigasyon ni PCPL Choljie A. Gumpay nasayran nga an nalambigit nga sakyanan an nagjagan gikan sa Agusan del Sur pasingod sa Syudad nan Surigao. Tungod sa kapaspas sa jagan, pag-abot sa P-3, Brgy. San Pablo, an nitabok na biktima sa kalsada didto aksidenting nadasmagan. Nasayran isab nga nakainom an biktima subay sa report.
Nakaangkon kini nan grabe na mga samad ug gidali pagdala sa Caraga Regional Hospital. Pagka alas 7:30 an takna sa buntag kagahapong adlawa, Setyembre 15, isa ka Rodel Cagasan, pag-umangkon sa biktima an nagpahibayo sa Sison Municipal Police Station nga namatay na an biktima sa alas 2:00 an takna sa Martes sa kaadlawon.
(Mark James Lisondra, Ronda 21 RPN DXKS Surigao)