Cebu City -Gipasidan-an sa SEC o Securities and Exchange Commission ang publiko batok sa pagpakiglambigit sa digital currency Xian Coin o XNC nga gipadagan sa infamous “coffee date” scammer Xian Gaza o Christian Albert Gaza.
Base sa advisory, ang SEC Enforcement and Investor Protection Department (EPD) kusganong nagpahimangno sa katawhan nga ang Xian Coin o XNC dayag nga usa ka Ponzi Scheme.
Ang Ponzi Scheme usa ka fraudulent investment strategy diin ang kuwarta sa new investors gamiton sa pagbayad sa “fake profits” sa unang investors diin kanunayng pabor ang top recruiters ug prior risk takers.
Ang scheme mopatuo sa biktima nga ang ganansiya gikan sa lehitimong negosyo bisag gikan sa ubang investors.
Ang imbestigasyon sa EPD nakadiskobre nga ang Xian Coin nakadani na og mamahimong investors nga makapahimus sa high range sa price stability nga kontrolado sa virtual crypto currency bank ni Xian Gaza nga may limited global supply nga 75 milyon XNCs.
Bisag dili illegal ang crypto currency sanglit gi-regulate man sa Bangko Sentral ng Pilipinas ang cryptocurrency exchanges, ang naka apan kay ang XNC dili rehistrado sa SEC. (Jhon Tadlip/JTY)
(Source: Securities and Exchange Commission, photo courtesy of Christian Albert Gaza Facebook account)