Mapasalamaton karon si Police Col. Michael Lebanan, ang provincial director sa Sarangani Provincial Police Office kon SPPO, tungod sa nahimong resulta sa monthly performance evaluation nga gipahigayon sa Police Regional Office 12.
Sa nigawas nga Unit Performance Evaluation Rating alang sa bulan sa Oktubre, nigula nga nag-Rank Number 1 ang Sarangani Provincial Police Office sa Rehiyon Dose sa overall operational ug administrative accomplishments, nakakuha og 89.13 percent. Ikaduha ang PNP South Cotabato 88.75 percent, ikatulo ang PNP Sultan Kudarat 87.15 percent ug ang PNP GenSan 86.17 percent.
Samtang, sa hisgutanan nga ginadiling druga, sa nigawas nga PRO 12 Performance Evaluation of Unit Commanders in Anti-Illegal Drug Accomplishments, nag-Numero Uno sa gihapon ang PNP Sarangani. Gikan sa rating period Disyembre 5, 2017 hangtud Oktubre 31, 2020, nakakuha ang SPPO og 55.94 percent. Sunod ang South Cotabato 53.58 percent, ikatulo ang PNP North Cotabato 50.38 percent.
Bulan sa Hunyo karong tuiga nipungko si Col. Lebanan isip bag-ong labaw sa Sarangani Provincial Police Office hulip kang Col. Attorney Lex Ephraim Gurat human na-promote ug na-assign sa Camp Crame.
Padayon lang sila sa PNP provincial headquarters katugbang ang mga chief of police, municipal police stations, mobile force, PDEA, NBI, CIDG ug uban pang police units sa pagtuman sa ilang mandato nga protektahan ang seguridad sa katawhang Sarangan kaabag ang kasundaluhan ug force multiplier. Ang mga susamang ebalwasyon regional wide ang gasukod sa ilang mga lihok aron mapalambo pa ang trabaho sa natad sa intelligence network, crime reduction and solution, investigation, apprehension, on time nga pag-submitar sa mga report, ug uban pang aspeto sa administration-pagdumala sa kapulisan.
Segun ni Col. Lebanan, malinawon ang tibuok Sarangani Province. Niubos ang crime rate ug nisaka ang crime solution statistics tungod sa limitadong lihok sa mga tao gumikan sa Coronavirus pandemic.
Nakadayig si Lebanan sa hugot nga suporta ug pagtinabangay sa mga LGU official, law enforcement agencies ug mga residente, hilabi na ang pagpugong sa pagdaghan sa matakdan sa Coronavirus. Anaa matud pa naka-ayuda sila Governor Steve Chiongbian Solon ug ang pito (7) ka mayor, kauban sila Vice Governor Elmer De Peralta, tanang board member ug sila Senador Manny ug Congressman Ruel Pacquiao.
Sila sa Sarangani Provincial Police Office ang padayon nga magpatuman sa mga balaod ug palisiya batok COVID-19, lakip na sa pagbantay sa mga border. Gani, sa ilang Oplan Sita gikan Abril 30 paingon Oktubre 31, basi sa datus gikan kang Lt. Col. Neil Wadingan, niabot na sa 18,173 kabuok indibidwal ang nasita sa dili pagtuman sa mga personal health protocol. 7,904 sa mga nahisgutan ang wala gasuot og face mask, 1,085 ang naglatagaw taliwala sa curfew, 6,996 ang wala mutuman sa physical distancing, ug libo kapin usab ang nisupak sa uban pang kamanduan sa LGU sa safety protocols.
Pipila na kanila ang naka-multa ug naka-community service. May gikasuhan pud tungod sa dili pag-ila sa otoridad ning panahon sa pandemya, nakasupak sa gilatid sa Revised Penal Code ang “resistance and disobedience to persons in authority and their agents.
(Provincial Information Office – Sarangani)