Walay natalang firecracker incident ang probinsya sa Sarangani sa pagsugat sa bag-ong tuig 2021. Kini ang gikumpirma sa opisina ni Sarangani Provincial Health Officer Dr. Arvin Alejandro rason nga gikalipay kini nila Governor Steve Chiongbian Solon ug pito (7) ka mayor. Segun ni Mr. Allan Parreño sa PHO Sarangani, zero casualty ang Sarangani sa mga paboto atong Disyembre 31.
Samtang, malipayon usab karon ang PHO Sarangani tungod sa nadawat nga Usa ka Milyon ka pesos (₱1M) gikan sa buhatan ni Department of Health Secretary Francisco Duque. Una pa natapos ang tuig 2020, nadawat na ang maong pondo pag-ila sa kalampusan sa tibuok Sarangani Province nga nagpabiling Malaria-free sulod na sa pito (7) ka tuig.
Matud pa ni Bong Yadao, ang medical technologist ug nangulo sa Vector-Borne Disease Unit sa PHO Sarangani sa opisina ni Dr. Alejandro, ang maong One Million pesos ang gamiton matud pa nila sa ilang tanang kalihukan aron magpabilin nga walay matalang kaso sa Malaria, katugbang ang tanang municipal health office inabagan sa mga barangay worker.
Dili tiaw ang kasinatian nila Yadao tungod makunayon ang ilang pagsaka sa mga lagyong barangay sa Sarangani hilabi na sa mga boundary area sa pikas mga probinsya, sa kamanduan ni Governor Solon, masiguro lang dili masudlan og Malaria ug ubang sakit nga dala sa mga lamok, pinaagi sa pang-apud apod sa mga kabalayan og mosquito nets, mga pinasahi nga moskitiro nga insecticide-treated kung diin ang epekto ang mulungtad hangtud sa lima (5) ka tuig. Sa nakalabay nga tuig 2016, gideklara usab nga Filariasis-free ang probinsya sa Sarangani.
Filariasis, ang balatian nga dala gihapon sa mga lamok ug langaw, nga gapahupong sa mga panit ug parte sa lawas sa tao. (Provincial Information Office – Sarangani)