Nangandam na karon ang PHO kon Provincial Health Office sa probinsya sa Sarangani ilalalum sa Sulong Kalusugan program ni Governor Steve Chiongbian Solon kauban ang mga munisipyo ug barangay sa pagpadayon nga pagpahigayon og bakuna batok sakit nga polyo. Karong sunod bulan sa Hulyo, Hulyo 20 paingon Agosto 2, matigayon ang ikaduhang bahin sa Bivalent Oral Polio Vaccination (bOPV) sa tibuok Region 12 ug sa Mindanao. Panagana kini nga bisan anaa ga-apong sa Coronavirus pandemic, magpabiling luwas sa sakit nga polyo ang mga kabataan singko (5) anyos paubos.
Tibuok kinabuhi mag-antos ang bata kung maigo sa polyo, kargo de konsensya sa ginikanan kung intensyonal nga mupakyas sa pagpabakuna sa ilang mga anak. Maong suportahan sa gihapon ang house-to-house polio immunization karong bulan sa Hulyo.
May kabahin sa dengue, diarrhea ug uban pang balatian tungod panahon na sa ting-ulan, nakatutok sa gihapon ang mga provincial, municipal ug barangay health team sa Sarangani. Padayon ang panawagan ni Provincial Health Officer Doctor Arvin Alejandro sa direktiba ni Governor Solon nga manghinlo ug sutaon pirme kung limpyo ang mga tubig sa palibot. Sa pagsuporta kana nila Senador Manny ug Congressman Ruel Pacquiao, Vice Governor Elmer De Peralta, tanang board member, mga mayores, barangay kapitanes, municipal health offices ug mga barangay health worker.
Gikan sa bulan sa Mayo, aduna nay upat (4) ka indibidwal ang nakabsan sa kinabuhi sa Gensan tungod sa bagsik sa dengue dala sa paak sa lamok. Hilum kining ni-atake samtang nakabantay ang tanan sa COVID-19. Sa Sarangani Province, gikan bulan sa Abril hangtud ning tungura, walay natalang namatay tungod sa dengue apan anaay mga kaso sa mga kalungsuran, maong angay kining bantayan gawas sa Coronavirus.