Nadugangan og lima (5) ka recovery sa COVID-19 ang probinsya sa Sarangani, basi sa DOH report kagabii. Aduna na karoy 104 kabuok mga indibidwal ang naka-recover ug nanga-ayo sa Sarangani Province, 18 na lang ang active cases.
Una ng nakatala og duha (2) ka fatality ang Sarangani. Samtang, ang Gensan ang ni-record na kagabii og napulo (10) ka tao ang namatay gumikan sa COVID-19 related death, walo (8) sa South Cotabato, upat (4) sa Sultan Kudarat, usa (1) sa North Cotabato ug usa (1) pud sa Cotabato City. Baynte sais (26) na tanan ang nahunusan og kinabuhi sa Region 12.
Gikalipay na lamang sa mga taga-Sarangani Province nga walay medical frontliner ang natakdan og Coronavirus. Sa proteksyon sa Labaw nga Makagagahum, walay gikabalita hangtud sa kasamtangan nga medical worker ang natakdan sa Sarangani. Sa training sa tanang contact tracing team, gipaniguro ni Governor Steve Chiongbian Solon nga protektado sila nga mga frontliner sa LGU pinaagi sa paghatag kanila og mga kagamitan, sama sa face mask, face shield ug PPE suit, ug ang pagpahigayon og mga skills training aron masinati ug mabansay pirme sa ilang mga kalihukan.
Sa gideklara nga local transmission sa Gensan, South Cotabato ug Sultan Kudarat, dili na layo nga mataptan og Coronavirus, maong paspas magpabalo sa mga health center ug municipal hospital aron hinanaling matabangan.
Kung makasinati og sintomas sa flu, sama sa hilanat, ubo, sip-on, sakit sa lawas-pamaol ug sore throat/katol ang tutunlan, naay diarrhea, dili na kalasa sa gikaon ug dili na usab makasimhot, angay nang ma-alarma. Subli usab nag-abiso si Governor Solon nga una musulod sa balay, hubuon ang gipangsuot sa lawas ug humulan sa pipila ka mga oras una labhan. Maligo una musulod sa balay panigurado nga walay kagaw nga madala sa panimalay.
(Public Information Office – Sarangani)