Anaa na karon sa 98.40 percent ang coverage rate sa probinsya sa Sarangani sa nagpadayon nga Measles-Rubella Supplemental Immunization Activity (MR-SIA) alang sa mga kabataan nag-edad siyam (9) ka bulan hangtud singko (5) anyos.
Sa labing ulahi nga datus gikan sa DOH sa Rehiyon Dose atong adlaw nga Biyernes, Nobyembre 27, nakakuha ang Sarangani og 98.40 percent coverage rate, gisundan sa South Cotabato 94.91 percent, Sultan Kudarat 89.68 percent, Cotabato City 85.98 percent, GenSan 84.03 percent ug North Cotabato 81.73 percent.
Sa tibuok Sarangani Province, sa report kagahapon sa PHO Sarangani, Martes, Disyembre 1, niabot na og 99.01 percent ang coverage rate sa probinsya. Nag-una sa gihapon ang lungsod sa Glan nga labing daghan ang nabakunahan, nakakuha kini og 101.23 percent, lagpas sa target sa DOH. Nisutoy ang Maasim anaa na karon sila sa 101.09 percent, Alabel 100.04 percent, Maitum 99.30 percent, Malapatan 99.01 percent, Malungon 98.52 percent, ug Kiamba 91.97 percent.
Segun ni Nurse IV Razel Bustria, ang immunization coordinator sa Sarangani Provincial Health Office ilalum sa opisina ni Doctor Arvin Alejandro, gi-extend sa Department of Health ang pagbakuna hangtud pa karong adlaw nga Biyernes, Disyembre 4, aron tagaan og higayon ang munisipyo ug mga barangay nga wala pa nakakuha sa target sa DOH nga 95 percent coverage rate.
Mapasalamaton na lamang kini sa tanang vaccination team sa probinsya, munisipyo, barangay, sitio ug purok tungod sa permanenteng pagka-aktibo taliwala sa bahad sa Coronavirus. Nakatutok pud ang mga municipal health office. Naa usab ang dakong pag-ayuda sa mga opisyales gikan sa mga purok chairman, barangay kagawad, barangay kapitan, mayor ug sa Sulong Kalusugan program ni Governor Steve Chiongbian Solon kaabag ang pribadong sektor ug national government agencies.
Sama sa Save the Children, Philippine National Red Cross, Mahintana Foundation, KCC Mall of GenSan Foundation, Sarangani Energy Corporation, Family Planning Organization of the Philippines, Philippine Nurses Association, PNP Sarangani, Armed Forces of the Philippines, Sarangani BHW Provincial Federation, STARTED kon Sarangani Transport Alliance for Reform and True Development, ug ang hut-ong sa media nga dakog gitabang sa pagpalapnag sa mga adbokasiya, sa pagsuporta nila Vice Governor Elmer De Peralta, tanang board member ug nila Senador Manny ug Congressman Ruel Pacquiao.
Luwas ang bakuna kontra tipdas ug rubella tungod sobra kwarenta (40) ka tuig na kining ginagamit sa DOH.
Samtang, sa pikas nga bahin, nakaangkon na usab og bag-ong ambulansya ang Sarangani Provincial Hospital gikan sa Department of Health Region 12 sa pamunuan ni Regional Director Aristides Tan. Type 2 ambulance kini nga kumpleto na sa mga kagamitan dili lang alang sa basic life support kundili sa advance life support. Gidawat kini mismo ni Doctora Aileen Brion, ang chief of hospital sa Sarangani Provincial Hospital.
Una na nga gibutyag ni Board Member Irish Arnado sa SP Committee on Health nga dakong tabang ang dungag ambulansya tungod nagsilbi na nga provincial COVID-19 isolation center ang Sarangani Provincial Hospital gikan pa sa pagsugod sa pandemya, sa kamanduan kana ni Governor Solon. (Provincial Information Office – Sarangani)