Cebu City- Patay ang usa ka wala mailhing tawo nga nakoryentehan sa poste nga iyang gisak-an sa sityo Tamarin, brgy. Umapad, Mandaue City alas 3:30 gahapon sa kaadlawon.
Si SFO1 Noel Codilla sa kabomberohan sa Mandaue mitug-an nga ilang nakuha ang lawas sa biktima duol sa transformer nga gitaod sa poste sa Visayan Electric.
Nagtuo si Codilla nga nahikapan sa lalaki ang live wire hinungdan sa iyang pagkirig ug pagpilit.
Tungod kay nagmatngon sa ilang lihok, matod ni Codilla, milanat og duha ka oras ang ilang pag-ugkat ug pagpakanaog sa lawas sa biktima nianang alas 5:40 sa buntag uban sa pag-abag sa mga sakop sa Visayan Electric.
Sumala pa ni Codilla, ilang gigamit ang usa nila ka hagdan atol sa retrieval operation.
Gihatod pa og suway sa mga awtoridad ngadto sa Mandaue City Hospital ang lalaki apan patay nang nahiabot.
Sa iyang bahin, si Master Sgt. Rey Patigdas sa kapolisan sa Opao miawhag sa mga pamilya nga nawad-an og sakop nga magsusi lang sa morgue sa ospital aron pag-ila sa namatay.
Matod ni Patigdas, dili taga Umapad ang biktima sanglit wala may usa sa mga nagpuyo sa lugar nga nakaila niini.
Gihulagway ni Patigdas ang tawo nga nag-edad og 30 ngadto sa 35 anyos ug mga 5’4” ang gitas-on unya nagsul-ob og green nga tshirt ug fatigue nga purol.