Patay nang napalgan ang usa ka bag-ong natawo nga batang babaye sa bakanteng luna sa sityo Timpolok, brgy. Babag, dakbayan sa Lapulapu alas 7 pasado gahapon sa buntag.
Si police officer Jude Abella sa station 3 sa LCPO miingon nga ang mga lumulupyo sa duol nagmulo sa kabaho sukad pa niadtong Lunes.
Matod ni Abella, uban sa abag sa pipila ka residente ilang gisubay ang tinubdan sa baho hangtod ilang nakit-an ang masuso sa bakanteng luna nagkadugta na.
Basi sa pasiunang pakisusi sa kapolisan, posibleng namatay ang bata tulo ka adlaw na ang nakalabay.
Sumala pa ni Abella, mihimo pa silag dugang imbestigasyon alang sa posibleng pag-ila sa inahan o sa gisugo sa pagpalabay masuso sa nahisgotang lugar.
Wala pa usab makaseguro ang kapolisan kon buhi pa ba ang bata o patay na dihang gibilin sa bakanteng luna sa Timpolok-Babag.
Kon hisakpan nila ang inahan o ang naglabay sa masuso, matod sa polis, ila kining paylan og kasong abortion o infanticide basi sa resulta sa imbestigasyon.
Gilubong lang dayon ang bata duol sa barangay hall sa Babag pipila ka oras human sa hamubong funeral service.