Gumikan sa mga gipahimutang nga birthing facilities sa kalungsuran ning probinsya, mikunhod sa siyam (9) na lamang ka maternal deaths sa tuig 2019 gikan sa 16 ka maternal deaths nga natala kaniadtong tuig 2015.
Kini ang nasayran gikan sa Provincial Health Office sa pagpangulo ni Dr. Esmeralda Nadela sa ilang programa kalabot na sa Maternal, Child Health and Nutrition.
Sa maong programa, giseguro nga ang matag mabdos makadawat sa tanang serbisyo sa dekalidad nga prenatal care, makapanganak sa accredited health facility ug giatiman sa trained and skilled health personnel.
Ingon man ang bag-ong anak mahatagan usab sa dekalidad nga pag-atiman ug kinahanglan ipasuso sa inahan sulod sa unom ka bulan.
Angayan usab sila makadawat sa postpartum care ug posibleng paglikay sa maternal ug infant death.
Dugang nasayran gikan sa maong buhatan nga sa miaging tuig, adunay 15 ka Buntis Congress ang gipahigayon sa mga lungsod ug sa duha ka dakbayan sa Dipolog ug Dapitan.
Sa tuig 2019 usab misaka ngadto sa 94% ang ihap sa mga mabdos nga nanganak sulod sa maong mga health facilties, diin milapas sa national target nga 90%.
Nasayran nga sa tuig 2019 dinhi sa Zamboanga del Norte, lakip na ang duha ka dakbayan sa Dipolog ug Dapitan adunay 31 ka Birthing Facilities uban sa License to Operate.
Kini maoy kinadaghanan nga lisensyadong Birthing Facilities sa tibuok Zamboanga Peninsula.
Samtang ang pagkuha sa dugang consultants alang sa Zamboanga del Norte Medical Center ang dako kini’g ikatabang sa emergency ug gi-refer nga maternal cases gikan sa nagkalain-laing lungsod.
Niini, si Governor Uy migahin kini ug P1,000,000.00 alang sa maong programa.
Kini naglangkub usab sa maternal and child kits, mga tambal, medical supplies, pregnancy test kits ug ingon man advocacy materials.
Ingon man, ang probinsya migahin usab kini ug P800,000.00 alang sa Nutrition Program nga naglangkub sa Micronutrient Supplements ug ubang pang medisina.
Ang maong programa inabagan usab sa Department of Health, UNICEF ug Hellen Keller International.