Suportado sa administration party ang giilang ‘Iron Lady’ sa General Santos City nga si City Councilor Rosalita Nuñez, kabahin sa plano niining pagdagan isip vice mayor sa siyudad, karong 2022 elections.
Atol sa gipahigayong press conference, giindorso na ni Partido Demokratiko Pilipino-Lakas ng Bayan (PDP-Laban) National President Atty. Rogelio “Bicbic” Garcia ang kandidatura ni Nuñez.
Una nang nagpadayag sa iyahang intensyon nga makig-lumba alang sa vice mayoralty race si Nuñez., human sa iyahang termino sa Sangguniang Panlungsod.
Gipanghingusgan pa ni Nuñez nga pursigido kini sa iyahang maayong katuyuan, bisan mamahimo kining “independent candidate”.
Una nang mitumaw ang mga hohongihong nga lakip sa ginakonsidera sa kasamtangang administrasyon si Nuñez sa ilahang ticket, higayon nga makahimo og line-up sa taliabot nga eleksyon.
Samtang, gawas sa konsehal, mitumaw usab ang pangalan sa veteran journalist ug publisher nga si Jong Gorgonio sa posibleng lakip sa mga pangalan sa mga modagan sa pagka-konsehal sa siyudad.
(John Rey Somido)