Impannakkel ni Mrs. Edna Orcino, administrator ti Phil. Red Cross Ilocos Norte Chapter nga “accurate” ti resulta ti “saliva COVID test”.
Inbunannagna daytoy a banag kabayatan ti panagbalinna a “resource speaker” iti regular session ti sang. Panlalawigan kangrunaanna iti pannakatratar ti gakat a nakaisagudayan ti pannakaipaay ti bileg ken Gob. Matthew Marcos Manotoc a sumrek ti katulagan iti Phil. Red Cross para iti panangisayangkatda ti “saliva COVID test” kadagiti kakailian.
Impalgakna nga adda ti kunpirmasyon ti food and drug Administration ken dagiti dadduma pay a maseknan nga ahensia pakaseknan ti kinasamayna.
Segun ken Orcino pinasingkedan dagiti nadakamat nga ahensia a daytoy ket maikunsiderar a “gold standard” a kas met laeng iti Rt PCR test.
Inlawlawagna a ti laeng pagdumaan dagiti nasao a “test” ket ti maala nga ”specimen”.
Imbatadna a sipud idi Marso 31 ket nangiyetnag ti Department of Health wenno DOH ti maysa a “circular” a mangiyinpuersar iti sumagmamano a protocol ken pagannurutan iti operasyon ti “saliva RT PCR test” nga isaysayangkat ti Phil. Red Cross wenno PRC.
Inbunannagna nga iti agdama ket adda ti sangapulo ket tallo a molecular laboratories ti PRC iti intero a pagilian.
Kunana nga iti agdama ket nakasagana dagiti PRC provincial chapter kas iti PRC Ilocos Norte Chapter nga agawat kadagiti pasiente nga agkalikagum a maipadalan iti ‘COVID-19 test” babaen iti pannakausar ti “saliva” wenno katay.
Segun kenkuana, nakasagana ti opisinada a mangidiaya ti serbisioda manipud iti alas otso ti bigat agingga ti alas tres ti malem manipud iti aldaw ti lunes agingga iti Sabado.
Innayonna a nalaklaka ti magastos babaen iti “saliva COVID test” no maidasig iti RT PCR.