Cagayan de Oro – Nakaseguro ang City Hall og pasalig gikan sa Department of Public Works and Highways (DPWH) ug uban pang ahensya sa paghatag og dugang ekipo alang sa declogging operation niini niadtong Septiyembre 12 nga gitawag og ‘Operation Likay Baha: Kanal Limpyuhan, Baha Malikayan.’
Kini human ang komite sa public works sa City Council pinangulohan ni Majority Floor Leader City Councilor Edgar Cabanlas nakigtagbo sa mga ahensya nga hingtungdan niadtong Biyernes (Sept. 6) alang sa programa nga magsugod sa Barangay Bulua.
Ang mga barangay nga giila nga high risk flood prone areas sa duha ka distrito sa dakbayan tungod sa dili maayong drainage maoy unahon sa operasyon.
Matud ni Cabanlas nga ilang tutukan ang pag-desilte sa mga drainage system aron maminusan ang baha tungod sa ting-ulan.
Magbukas ang ‘Operation Likay Baha – Kanal Limpyuhan, Baha Malikayan’ sa usa ka programa sa Barangay Bulua alas 7 sa buntag karong Septiyembre 12.