Patay si Patrolman Jhon Paul J. Gerida, 28 anyos nga membro sa 2nd Provincial Mobile Force Company.
Ang maong insidente nahitabo kaganihang alas 10:35 sa buntag, Disyembre 8, 2019 didto sa Purok 5, Consuelo, Bunawan, Agusan del Sur.
Sa report ni Police Staff Sergeant Gil Ursos, milusad sa joint operation ang PNP Bunawan, Agusan Del Sur Provincial Inteligence, 1st ug 2nd Mobile Force Company, 1303rd Regional Mobile Force Company ug Regional Special Operations Group aron pangitaon ang suspect nga police nga mipusil sa iyang company commander nga si Lt. Col. Rex Lomente didto sulod sa opisina sa 2nd PMFC Barracks, Purok-1, Bunawan Brook, Bunawan, Agusan del Sur niadtong Disyembre 6, 2019 sa may 9:25 ang takna sa gabii.
Kagaina dihang pa-surrenderon na unta ang suspect apan nakigpinusilay kini sa mga otoridad hinungdan nga mibalos ang tropa ug maayong pagkaigo ang ulo ni Gerida.
Narecover sa crime scene ang usa ka caliber .45 pistol nga may serial no. A004311, usa ka magazine kargado’s mga bala ingon man duha ka basiyo sa napabutong mga bala sa caliber .45.
Kahinumduman si Gerida giistorya sa iyang commander sulod sa opisina dihang nabati ang buto sa armas. Napalgan nga nagkadugo ang ulo ni Lt. Col. Rex Lomente ug may samad pinusilan sa iyang tuo nga agtang. Gidali pagdala ang biktima sa Bunawan District Hospital ug gibalhin sa Davao. Dali nga misibat ang suspect ug gilusad dayon ang manhunt operation. Didto siya masakpi ganihang buntag sa Purok 5, Consuelo, Bunawan, Agusan del Sur ug gikatahong misukol sa iyang mga kaubanang police. (RPN DXKS with reports from Bunawan PNP)