Inabangan ng PNP-Highway Patrol Group (PNP-HPG) ang ilang namamasadang tricycle driver sa kasentruhan ng bayan ng Daet sa araw mismo ng kapaskuhan hindi para hulihin kundi bigyan ng pamasko.
Sa pangunguna ni PNP HPG Provincial Officer Police Major Joselito Quila, nabigyan ng bag of groceries ang hindi bababa sa dalawampung recipients mula sa iba’t- ibang TODA
Naglalaman ito ng bigas, kape, creamer, asukal, de lata at noodles.
Mistulang nabigla pa nga ang mga tricycle driver dahil sa pag- aakalang huhulihin sila para isyuhan ng ticket at mayroon pa nga raw na tinangkang umiwas.
Pero imbes na ticket, pamaskong handog pala ang kanilang matatangap na ikinatuwa naman ng mga nabigyan.
Kahit papano, malaking tulong din ito lalo na sa mga tricycle driver na hikaos sa buhay na may ngiting tinanggap ang munting regalo mula sa tinaguriang Guardians of the Highway.
Mababatid na sa panahon ngayon ay lalong nagpahirap sa buhay ng mga tricycle driver ang nararanasang krisis na dulot ng COVID- 19 pandemic kung saan isa ang kanilang sektor mga labis na naapektuhan.
Kung maalala sunod- sunod na operasyon ang inilunsad ng PNP HPG sa iba’t- ibang bayan noong mga nakatalikod na araw para hulihin ang mga traffic violators.
(Source: BNFM Daet & Bicol News)