Cebu City- Pito ka guwardiya sa CPDRC o Cebu Provincial Detention & Rehabilitation Center ang naapil sa 122 ka bag-ong kaso sa coronavirus disease o Covid 19 sa Sugbo.
Sa iyang public briefer, si Gob. Gwendolyn Garcia miingon nga ang tanang jail guards gi-isolate na.
Basi sa record sa health department, si Garcia midugang nga ang bag-ong mga kaso naglakip sa 108 sa Cebu City, upat sa Lapulapu City, ug tulo sa Mandaue City.
Matod ni Garcia , ang upat ka bag-ong nataptan sa virus sa Lapulapu naggikan sa brgy. Pusok, Ibo ug Agus samtang ang tulo sa Mandaue gikan sa brgy. Mantuyong ug Opao.
Pero ang PIO o Public Information Office sa Mandaue mikompirmar lang duha kaso.
Ang duha ka bag-ong kaso nga giila sa PIO mao ang 9 anyos nga batang lalaki ug 37 anyos nga babaye sa sityo Gumamela, Opao nga pulos kadugo sa MC17 sa samang barangay.
Pero si Felix Suico sa CDRRMO una nang mireport nga ang ikatulong kaso usa ka hamtong nga lalaki sa sityo Asinan, brgy. Mantuyong.