Cagayan de Oro City – Hugot nga gisuportahan sa konseho sa syudad ubos ni bise mayor Kikang Uy ang pagpaubos sa pipila ka dapit dinhi sa dakbayan sa Cagayan de Oro sa kwarantina o’ focused containment.
Kini sa tinguha nga mapakgang ang pagkaylap sa corona virus ug mapahigayon ang tukmang contact tracing, isolation ug intensive surveillance monitoring.
Ang pagpahigayon sa localized nga kwarantina pinasubay sa Executive Order nga giluwatan ni mayor Oscar Moreno alang sa maong katuyuan.
Lakip sa pipila ka mga gitumbok nga dapit mao ang Zone 1 ug 2 sa barangay 26, Zone 1 sa barangay Lumbia ug pipila ka bahin sa Sitio Mabasa, Balulang.
Niini, kusganong gihangyo sa bise mayor ang katawhan sa mga nalambigit nga lugar nga makigtambayayong ug moabag sa paningkamot ug paninguha sa kagamhanan nga mapakgang ang pagkaylap sa Covid 19 pinaagi sa pagpuyo sa ilang mga panimalay ug dili maggawas gawas. (Sangguniang Panlungsod)