Ang Phividec Industrial Authority nangandam karon sa konstruksyon alang sa Integrated Steel Mill ug sa pagpadako sa pantalan niini. Matud pa ni Phividec Administrator Jose Gabriel “Pompee” La Viña nga ang iyang mission sa maong opisina mao ang paghatud katumanan sa Integrated Steel Mill nga mabukas sa trabahong moabot sa 30mil nga adunay multiplier effect ngadto na sa dugang 70mil ka direktang trabaho.
Ang maong proyekto nagsugod sa dihang ang nasud sa China mitanyag kang Presidente Rodrigo Duterte aron pagtabang sa Integrated Steel Mill sa nasud.
Malaumon si La Viña nga dugtong sa katukuran sa maong steel factory, ang mga industriya nga nagdepende sa steel products sama sa car manufacturers ang manulod sa atong dapit.
Sa pikas, ang Mindanao Container Port nga usa sa mga nagsebisyo sud sa Phividec ang adunay bag-ong gitanyag nga serbisyo karon nga mao ang container Line nga diin ang barko niini mobyahe gikan sa Singapore ngadto sa Cebu ug Cagayan de Oro ug mobalik paingon Singapore pagkasunod adlaw.
Niining paagiha, matud ni La Viña, kini naghatag sa mga producers, industries, Small and Medium Enterprises sa produkto nga adunay market sa South East Asia, China ug Singapore. Gawas pa, kini nagbukas usab sa merkado ngadto na sa Middle East, India, Pakistan ug sa sub India continent. (Gin B. Serohijos/ PIA-10)