Malipayong gi-abi-abi ni City Mayor Darel Dexter T. Uy ang bag-ong gitudlo nga Provincial Environmental Management Unit kon PEMU – Zamboanga del Norte (ZDN) Chief, Mr. Ryan I. Almadin uban sa mga kawani gikan sa DENR – Environmental Management Bureau (EMB) IX atol sa gipahigayon nga “Courtesy Call” kaganihang buntag, Abril 26, adlaw’ng Lunes, ning tuiga sa may alas-9:00 ang takna sa buntag.
Lakip usab sa mitambong sa maong kalihokan sila si CEMU – Piñan ug Manukan, ZDN Chief ug Environmental Management Specialist II, Engr. Ben-Azer A. Abing, Environmental Monitoring Officer, Mr. Leo Jacinto D. Alistado ug City Environment and Natural Resources Officer, Ms. Mercedita C. Guerrero.
Tumong sa maong pagbisita mao ang paghisgot ngadto kang Mayor Uy kabahin sa Eco-Solid Waste Management dinhi sa dakbayan partikularmente na sa mga pasilidades didto sa Brgy. Dicayas ug Sangkol.
Gipahibalo usab sa nasangpit nga buhatan ang pagka-nominado ning siyudad lakip na ang paghatag og mga giya sa pag-apil sa pasidungog nga “EMB Nueve – Game Changer” nga gipangunahan sa DENR – EMB IX isip pag-ila ngadto sa dakbayan sa Dipolog alang sa mga paningkamot ug pasalig niini sa pagpanalipod ug pagpreserba sa kinaiyahan. (City Information Office-jnp)