Cebu City – Nadakpan sa entrapment operation ang usa ka 53 anyos nga nangangkong pastor sa usa ka religious congregation nga nag-atubang og kasong large scale illegal recruitment ug estafa sa usa ka mol sa Brgy. Banilad, Cebu City niadtong Hunyo 10.
Si Atty. Renan Oliva, director sa National Bureau of Investigation o NBI-7 miila sa dinakpan nga si Bernardo Albarando nga nailhan usab nga Pastor Billy nga lumad sa Argao, Cebu.
Suma pa ni Oliva, gipasaligan ni Pastor Billy ang napu ka tawo nga hatagan og trabaho sa pabrika sa New Zealand nga may suweldo nga ₱ 178,000 matag buwan.
Apan ang mga biktima mireklamo kay gipabayad sila matag usa og labing menos P160 mil nga matod pa, alang sa proseso sa mga dokumento.
Pero natingala sila nga hangtod karon wa pa man sila makadawat sa mga papeles ug walay abiso kanus-a sila ipada sa New Zealand.
Nasuta nila ni Oliva nga migamit si Pastor Billy og bogus o mini nga email address sa iyang operations.
Mahimo siyang makaestorya sa mga biktima gamit ang maong e-mail address nga nagda kunohay sa ngan sa kompaniya nga nagbasi sa Auckland, New Zealand.
NBI nanawagan sa mga nabiktima
Giagni sa National Bureau of Investigation o NBI-7 ang ubang biktima ni Pastor Billy pagduol lang sa ilang buhatan aron pagkuha sa akusado.
Sa nasayran, si Bernardo Albarando, nga mas nailhang si Pastor Billy sa mga sakop sa ilang religious congregation, nadakpan sa entrapment operation niadtong Hunyo 10.
Nalambigit si Pastor Billy sa large scale illegal recruitment ug estafa.
Gipasabot ni Atty. Renan Oliva, director sa NBI 7, kon naay mang-recruit susihon dayon sa POEA kon lehitimo ba kini.
Apan tungod lagi sa kalisod sa panahon naa gyoy mopahimus ug manguwarta inay tabangan nga makatrabaho sa tinarong nga paagi.
Ang 53 anyos nga si Albarando nanghimakak sa pasangil pero matod ni Oliva, naa nay upat ka tawo nga nangangkong nabiktima ni Albarando.
Iyang gihagit ang laing unom nga mobisita sa ilang opisina aron moapil pagkuha sa tawong lumad sa Argao.
Gitug-an ni Oliva nga niadtong June 9, midangop kanila ang upat ka aplikante nga gisaarang makatrabaho isip factory workers sa New Zealand nga mosuweldo og ₱ 178 mil matagbuwan apan wa gyoy trabaho nga miabot bisan nakabayad silag processing fee nga ₱ 160 mil matag usa. (Jhon Tadlip/JTY)
(News & photos courtesy of National Bureau of Investigation 7)