Mukabat na karon sa trese (13) kabuok modernized public utility jeep (MPUJ) ang mamasada sa probinsya sa Sarangani alayon sa programa nilang Pangulong Rodrigo Duterte ug Department of Transportation DOTr Secretary Art Tugade nga pag-moderno sa transportasyon sa nasud, katambayayong ang dakong papel sa mga kooperatiba sa transport sector ug mga lokal nga gobyerno.
Kini nga trese ka unit ang pasiuna sa Sarangani Province, hapit Tres Milyones ka pesos (P3M) ang kantidad sa matag usa. Komportable kining masakyan gumikan aircon sa sulod, haw-ang ang mga lingkuranan ug kumpleto sa mga accessory sama sa Wi-Fi, GPS, television ug dashboard camera, manghud sa bus ang porma. Upat (4) na ka unit ang nagamit sa Malapatan Drivers Operators Transport Cooperative (MDOTC).
Tulo (3) ka unit ang naga-operate sa Malungon Gensan Operators Drivers Cooperative (MALGENTRANSCO) sa pag-ayuda sa LGU Malungon sa pamunuan ni Mayor Tessa Constantino. Duha (2) ka unit sa Glan Operators Drivers Transport Cooperative (GODTRANSCO) ang muabutay. Ug tag-usa (1) ka unit ang ginagamit na karon sa Kiamba Transport Cooperative (KIAMTRANSCO), Malandag Transport Cooperative (MTC), ug sa ALSAMCO Transport Services Multi-purpose Cooperative sa Alabel (ALTRANSMULCO). Muabutay ang dungag usa (1) sa Alabel sa pagtabang sa LGU nila Mayor Nonoy Salarda.
Ato lang Lunes, atubangan sa Kapitolyo sa Sarangani, opisyal nang gipakita sa publiko ang maong mga modernong sakyanan kauban sila LTFRB 12 Regional Director Paterno Reynato Padua, Vice Governor Elmer De Peralta, ug mga opisyales sa transport coops sa Sarangani sa pagpanguna sa ilang provincial federation association nga gi-organisa ni Governor Steve Chiongbian Solon sa dihang bise gobernador pa kini tuig 2008, gitawag nga STARTED kon Sarangani Transport Alliance for Reform and True Development.
Segun ni STARTED Chairperson Merly Nebres, bisan matud pa pandemya apan wala nihunong ang pagtinabangay sa opisina ni Governor Solon, mga mayor sa Sarangani, transport group ug LTFRB Region 12. Mao usab ang mensahe ni Vice Governor De Peralta kuyog si Assistant Provincial Administrator Engr. Gerald Faciol, sa pagsuporta sa tanang board member lakip na nila Senador Manny ug Congressman Ruel Pacquiao.
Samtang, kontento ang transport sector sa Sarangani Province sa ayuda sa LGU Sarangani. Makanunayon matud pa ang ilang komunikasyon sa opisina ni Governor Solon, kauban sila Board Member Arman Guili sa technical working group, aron tabangan sa paghan-ay sa ilang mga papeles sa pag-angkon og mga modernong sakyanan ug sa gimandato kanila sa Duterte administration nga kamugnaan sa Local Public Transport Route Plan kon LPTRP.
Naka-uyon usab ang transport group sa Sarangani sa pagsiguro sa opisina ni Governor Solon paagi sa STARTED nga dili sila mabitin sa mga ayudang pinansyal tungod sa pirwisyo nga gidala sa Coronavirus outbreak.
Segun ni Ms. Sharon Esportuno, ang technical staff sa transport program ni Governor Solon, nakadawat og ₱ 6,500 ayudang pinansyal gikan sa DOTr ug LTFRB 12 ang matag kwalipikadong operator sa van, jeep, multicab ug mini-bus nga myembro sa kooperatiba atong first quarter karong tuiga. Samtang, ₱ 25,000 pud ang nadawat 2nd quarter sa kada kwalipikadong driver sa jeep ug multicab nga myembro sa kooperatiba gikan gihapon sa DOTr ug LTFRB 12.
Ginalihok na karon nga sa pagbalik sa Libreng Sakay program, makaapil na sa pagpamasada ang mga van, jeep, multicab ug modernized public utility vehicle. Giapuran usab sila og napulo (10) ka kilong bugas ug mga tray sa itlog gikan sa opisina ni Governor Solon. Sa programa nga DOLE-TUPAD sa pagpaningkamot ni Senador Joel Villanueva ug sa SAP, tag-Singko Mil ka pesos (₱ 5K) matag usa ang nadawat apil mga driver sa traysikad, traysikel ug habal-habal.
(Source: Provincial Information Office – Sarangani)