PAROLA SA P. REYES TAG-GUBA TUNGOD SA IPABAROG NA MARINA REGIONAL OFFICE BUILDING

PAROLA SA P. REYES TAG-GUBA TUNGOD SA IPABAROG NA MARINA REGIONAL OFFICE BUILDING

by RPN
79 views

Mga kabilya na lamang an naabtan kahapon sa Radyo Ronda sa pakisusi didto suyod sa Philippine Ports Authority compound. Ini tapos mipalanog sa ila kakurat an mga abogado sa IBP na nakakita sa pagbungkag nan “parola” sa P. Reyes kanto City Boulevard jadton Lunes nan duyom, Pebrero 24, 2020.

Sumaya pa ni Acting Manager Froilan Al Caturla sa Port Management Office dinhi sa Surigao, sa suyod sa PPA compound diin nagbarog an parola an naapektuhan ini sa tukuron na MARINA Regional Office building amoy hinungdan na tag-bungkag.

Nag-react an mga abogado sama kan kanhi Vice Mayor Alfonso Casurra kon jaoy ba clearance gikan sa Commission on Audit an pagguba niini. Taghisgutan isab nija na an kasaysayan, landmark o balor sa ini na istruktura na makonsiderar na tourist attraction. Amo isab ini an lugar na tagkilaya na jaon sa atbang nan parola an building sa Integrated Bar of the Philippines.

Tagdugang paghisgot ni Casurra na an Philippine Ports Authority wayay pakialam ilabina sa pag-otro nan ila gate na moagi an mga dagku na truck sa City Boulevard sanan maglisod pagliko sa kanto Borromeo sanan P. Reyes.

Samtang an Philippine Coast Guard dinhi sa Surigao sa pagpangulo ni Commander Lawrence Roque naglaong sa exclusive interview kahapon na may pagtugot gikan sa ilang head office na i-demolish an light house kon parola. Tagkasabutan nila sa Maritime Industry Authority na sa roof top nan 3-storey building adto ibutang pagbalik an light house apan dili na susama an hitsura sa tag-demolish na may hagdanan. Sa pagkakuman an bulb assembly sanan an circuit niini an jaon taghipusan sa opisina nan Philippine Coast Guard.

Sa pikas bahin naguol si Kagawad Elenor “Bitbit” Yuipco-Bonono nga tag-guba an parola. Sumala sa idja kapikas na si Taft Punong Baranggay Pablo Onyot Bonono Jr. na sija isab nakuratan dihang sa pre-construction meeting sa MARINA Regional Office iban an taga-PPA, City Engineering, DPWH sanan contractor na apil sa maguba an parola tapos adto ibalhin sa taas nan MARINA regional office building.

An project gipatrabaho sa DPWH sa pribadong contractor diin target na matapos kini sa Oktubre 2020.

Sumaya ni Coast Guard Commander Roque na kini dili pa kon karaan kay naipabarog kini niadtong dekada 90, apan an mga taga Batang Pier naglaong na karaan na kini nga landmark diin did-on sila motigsok kon mangaligo. “Jaon parola sa pier likod jaon sa una nan rice mill nan mga Danaque. Dekada 70 did-on na jaon daan, nabantog pa gani jaon na tawhan kay pirme jaon dinha jaoy malumos tungod sa kasuyog,” nagkanayon si Lawrence Tan.

Ang mga karaan na istruktura jaoy balaud na panalipdan kini sanan dili bungkagon. “An mga buildings and monuments 50 years and above are already considered built as heritage structures and under RA 10066, it will be protected and conserved,” sumaya ni City Tourism Officer Roselyn Armida Merlin. Gikatakda nilang hisgutan sa City Culture and Arts Council ang amo na pagbungkag sa parola. (RPN DXKS exclusive report)

0 comment

Related Posts