SARANGANI PROVINCE– Nagmaya karon ang mga opisyales sa probinsya sa Sarangani tungod kay pirmado na ni Pangulong Rodrigo Duterte ang Republic Act No. 11224 alang sa kamugnaan sa Sarangani Sports Training Center.
Gipirmahan kini sa presidente atong Pebrero 22 og gipagawas ang kopya ngadto sa publiko ato lang Sabado, Marso 2.
Segun ni Engineer Gerald Faciol, ang labaw sa planning division sa Sarangani Provincial Engineering Office ubos sa pagdumala ni Provincial Engineer Jerry Belbider, may kasiguruhan na matud pa nga makapabarog og labing moderno nga sports complex sulod sa Kapitoyo sa Sarangani tungod kay dili basta-basta ang nahimong basihan kundili usa gyud ka national law.
Sa maong nasyonal nga balaod, gitahasan sa nasyonal nga gobyerno ang PSC kon Philippine Sports Commission sa pakig-alayon sa Provincial Government sa Sarangani og sa Municipal Government sa Alabel, gipangunahan ni Mayor Nonoy Salarda, nga ipatindog ang Sarangani Sports Training Center.
Gimanduan usab sa maong Republic Act No. 11224 ang chairman sa Philippine Sports Commission nga siguruhon nga mapondohan ang panginahanglanon sa pagpabarog sa maong gambalay, nga muabot pud kini tanan og sobra P500+ Milyones ka pesos.
Gibutyag ni Engineer Faciol nga inisyatibo matud pa ni Governor Steve Chiongbian Solon nga makapa-upgrade og sports complex sulod sa Sarangani Capitol nga mahimo usab nga sports academy sa tibuok Rehiyon Dose, hinungdan nga naghatag dayon og proposal ang gobernador ngadto kang Senador Manny Pacquiao, og tuod man walay duha-duha nga niuyon ang fighting senator.
Nipasa og Senate og House bill si Senador Pacman og si Congressman Ruel Pacquiao sa Kongreso sa Pilipinas, og kini karon ang hingpit ng nahimong republic act.
Apan sa kasayuran sa tanan, wala pa man napirmahan ni Pangulong Duterte ang maong balaod, gisugdan na ang pasiunang konstraksyon sa Phase 1 og Phase 2 sa maong Sarangani Sports Training Center ubos sa superbisyon sa DPWH Sarangani, may pasiunang pondo nga P200 Milyones ka pesos, pinaagi kana sa pagpaningkamot nga makasungkit og pondo sa magsuong Senador Manny og Congressman Ruel.
Gikumpirma ni Engineer Faciol nga malagmit karong tuiga 2019, mahuman na pag-konstrak ang Phase 1 og Phase 2 kung diin unang makita ang indoor multi-sports facilities, sama sa tennis court, basketball court, volleyball court, badminton court, og mga training area sa boxing, taekwondo, wrestling og weightlifting, apil na ang Olympic-size nga swimming pool, pito (7) kabuok tag-duha ka andana nga dormitoryo kapuy-an sa mga atleta, og 400 metros nga oval track adunay atop dili na unya mainitan samtang gadagan-dagan.
Sa habig sa school principal sa Alabel National High School nga si Sir Ernesto Yuzon, ila na matud pang giplastar karon ang plano nga makabutang og extension campus sulod sa Sarangani sports complex aron kadtong mga kabataan nga mahiligon sa sports ang makapadayon gihapon sa ilang mga pagbansay isip mga magdudula nga dili maapektuhan ang ilang pag-eskwela, sa pagsuporta nila Vice Governor Elmer De Peralta og tanang board member.