Usa ka sakop sa environment group ang miprotesta sa mga karaan na kaayong kahoy diha sa kadalaanan tungod sa giingong road widening project.
Si Sustines Magallanes sa Task Force Makajalar naalarma sa iyang nasaksihan nga kapin sa traynta ka mga kahoy ang gipangputol sa kadalanan sa Tablon, Cugman ug Gusa. Ang mga kahoy nga gipangputol nag-apil na sa acacia ug mahogany.
Samtang iyang giuyunan ang clearing, parking ug illegal settler apan dako siyang supak sa pagpamutol sa kahoy bisan nga layo na sa dalan. Si Magallanes nagasugyot nga unta adunay public consultation una nga pagahimuon sa di pa putlon ang mga karaang kahoy nga himsog pa ug dili pa himalatyon. Iya usab nga gikwestyon kon kinsa ang nakabenepisyo sa mga kahoy ug kon asa kini pangdalha.
Sa ilang kabahin, si Vinah Maghinay, ang tigpamaba sa DPWH-10 nagsugilon nga nga pagpamutol sa kahoy adunay permiso gikan sa City Environment and Natural Resources. Matud niya kalagmitan, ilang putlon ang kahoy tungod sa mga road widening project. Sukwahi sa pamahayag ni CLENRO Chief Engineer Arman Cuenca sa iyang kabahin kinsa nag-ingon nga ang syudad wala mapahibalo sa pagpamutol sa kahoy sa National Highway. Gipahibalo na lamang kini sa dihang naputol na ang mga kahoy.