Cebu City- Gilibkas na sa kagamhanan sa dakbayan sa Sugbo ang lockdown sa sityo Zapatera, brgy. Luz human sa kapin sa usa ka buwan nga pagpatuman sugod alas 12 gahapon sa udto.
Miluwat si Mayor Edgardo Labella og memorandum sa Philippine National Police, City Health Office ug City Disaster Risk Reduction Management Office paglibkas na sa lockdown.
Sa nasayran, niadtong Abril 7 gipaubos sa lockdown sa kadagkoan sa Barangay Luz ang maong sityo dihang nagsugod pagkatap ang Covid 19 sa mga nagpuyo.
Segun sa memo ni Labella, iyang gimando ang paglibkas sa lockdown sa maong lugar dihang nagkadaghan ang mga pasyente nga naulian.
Ang paglibkas sa lockdown gihimo usab nunot sa rekomendasyon sa barangay pinaagi sa resolusyon pinetsahan og Mayo 18.
Sa nasayran, ang brgy. Luz ang unang giisip nga epicenter sa virus tungod sa kadaghan sa mga nagpositibo apan takulahaw lang nga naapsan sa brgy. Mambaling hinungdang didto na pod motutok ang pagtagad sa city government.