Cebu City- Gitugot na ang pagpangaligo og dagat, sapa ug ubang tubigan sa probinsiya sa Sugbo gawas sa dakbayan sa Talisay.
Kini nunot sa pagtakli na sa lalawigan sa GCQ o general community quarantine sugod gahapon, Mayo 20.
Hinuon, ubos sa lagda, ang pagpangaligo sa beach ug ubang wanang sa tubig mahimo lang gikan sa alas 6 sa buntag ngadto sa alas 12 sa udto ug dili ala una sukwahi sa unang report pero diha lang sa lungsod o siyudad nga gipuy-an.
Segun sa EO o Executive Order no. 17 ni Gob. Gwen Garcia, ang pagbiyahe sa laing lugar aron didto mangaligo sa dagat ug ubang tubigan wala pa itugot bisan ubos na sa GCQ ang Cebu.
Nalatid usab sa EO 17 nga ang mga LGUs o local government units diin nahimutang ang beach gimandoan sa higpit nga pagpatuman sa social distancing ug limitahan ang gidaghanon sa tawo nga magpiknik.
Samtang bisag bukas na ang mga hotel ug resorts pero wala gihapon itugot ang mass gatherings o tapok-tapok panahon sa mga okasyon.
Segun sa EO 17, ang panag-uban o panagtapok sa napulo ka tawo matawag na og “gathering”.
Gimando usab ni Garcia sa mga establisimento nga tagsa lang ka tawo ang paokupahon sa matag lawak sa walay pag-isip sa relasyon sa guest o bisan sakop lang sila sa usa ka pamilya.
May 21/Local
Mahimong nang makapauli sa ilang dapit sa lalawigan ang mga tawo nga natanggong sa dakbayan sa Sugbo ug ubang dapit sa probinsiya tungod sa pagpatuman sa ECQ o enhanced community quarantine.
Kini nunot sa pagpailawom na sa lalawigan sa GCQ o general community quarantine sugod gahapon.
Pinasikad sa EO o Executive Order no. 17, nga naglatid sa sumbanan ug protocol sa GCQ, ang gipapauli nga mga OFWs o Oversease Filipino Worers ug ubang Sugboanon nga na-stranded sa ubang probinsya gitugtan na pagbalik sa Sugbo basta negatibo sila sa Covid 19 test gamit ang Polymerase Chain Reaction o PCR machine.
Segun pa sa EO 17, kinahanglang magbaton ang mga OFWs og certificate of completion sa 14 ka adlaw nga kwarantina gikan sa DOH o LGU ug sa ilang pag-abot, ipaubos na usab sila sa dugang pito ka adlaw nga quarantine sa OWWA o Overseas Workers Welfare Administration sa dili pa tugtang makauli sa ilang pinuy-anan.
Basi sa EO 17, walay problema ang biyahe gikan sa mga lugar nga giisip nga medium risk apan ubos usab sa GCQ sama sa Sugbo.
Pero bisan sa transition sa lalawigan ngadto sa GCQ, nagpabilin ang higpit nga border control sa dakbayan sa Sugbo diin daghan ang nataptan sa Covid 19.