DAVAO CITY- Mapasalamaton ako sa atong mga Sangguniang Panlalawigan Members, sa panguna ni Vice Gov. Rey Uy, sa Department Heads sa panguna ni Provincial Administrator Engr. Josie Jean Rabanos ug sa tanang mga empleyado sa Kapitolyo sa malampuson nga paglusad sa atong Capitolympics 2019.
Mao kini ang atong pakigduyog sa 119th Anniversary of the Philippine Civil Service. Gihimo nato kini aron maka-exercise kita alang sa mas maayong panlawas ug mas madasigon nga pag-alagad sa katawhan. Ug ang pinakaimportante, aron makahatag ug dugang maayong relationship kanatong tanan nga taga-Kapitolyo. Dili ni gihimo nga inig-human sa dula, imbes nga amigo ug amiga di na magtinagdanay kay naglalis na diay panahon sa dula.
Lingaw kaayo kita sa cheering, zumba, Bb. At G. Capitolympics 2019, sa atong exhibition basketball games ug uban pang padula. Atong ipalig-on ang atong sportspersonship, panaghigalaay ug panaghiusa, dili lang hangtud mahuman ang atong padula sa Disyembre. Ato kining ipakayab sa matag-adlaw nga atong pagsilbi sa katawhan alang sa kalampusan sa atong mga tumong ug tinguha alang sa inklusibo ug malahutayong kalamboan para sa tanang mga Dabaonon.
Ako manghinaut nga kitang tanan motabang aron mapatungha ang usa ka hataas, kasaligan ug matinud-anon nga serbisyo publiko, ingong pagsagop sa tema sa selebrasyon nga, “Civil Service at 119: Upholding Integrity and Building a High-trust Society”. Ang kabag-ohan alang sa tinuod nga kalamboan sa Davao del Norte. One Team. One DavNor!