Mahimo pang makagamit ang mga LGUs o local government units sa probinsya sa mga tunghaan isip temporaryong isolation center hangtod sa Hunyo 15.
Atol sa miting uban kang Gob. Gwendolyn Garcia, si Direktor Salustiano Jimenez sa Department of Education o DepEd-7 miuyon nga lugwayan ang paggamit sa mga eskuylahan isip isolation center.
Sa sayo pa, ang mga LGUs mipirma og MOA o Memorandum of Agreement tali sa division office sa DepEd alang sa paghimong isolation center sa mga tunghaan para sa mga gidudahang nataptan sa coronavirus disease o COVID-19.
Ang nahisgotang MOA gitakda nang matapos o mohupas sa Mayo 31 hinungdang giinatan kini ngadto sa Hunyo 15.
Matod ni Garcia, ang mga mayor mipadayag og kabana sa mga isolation center dihang gipahibawo sa DepEd nga mobukas ang klase alang sa tuig tingtungha 2020-2021 sa Agosto 24.
Nasayran nga 21 sa 44 ka lungsod ang naggamit sa mga eskuylahan isip isolation o quarantine center sa mga PUMs o persons under monitoring.
Bisan kon kapin pa sa duha ka buwan sa dili pa magsugod ang klase, si Jimenez miingon nga gamiton sa mga magtutudlo ang tunghaan karong Hunyo alang sa enrollment ug training.
Giawhag usab ni Jimenez ang Department of Health o DoH 7 pag-certify nga luwas gikan sa SARS-CoV2, nga maoy hinungdan sa COVID-19, ang mga tunghaan para luwas usab ang mga magtutudlo ug mga tinun-an.