Cebu City – Andam na sa pagdawat ang Mactan Cebu International Airport (MCIA) ug bag-ong mga international flights karong adlawa, Domingo, Hunyo 13, 2021, kung dili i extend sa Malacanang ang order pag reroute sa mga flights ngadto sa Ninoy Aquino International Airport (NAIA) sa Manila.
Matod ni Atty Glenn Napuli, officer-in-charge sa MCIA nga samtang nagpaabot sila, ilang gideklarar nga andam sila kung wala nay extension.
As of alas otso kagabii, walay nadawat ang MCIA nga extension order sa Malacanang.
Sa miagi, duha ka higayon na nga divert ang international flights ngadto sa NAIA nga alang sa Inter-Agency Task Force (IATF) pagsiguro sa COVID-19 protocols nga ma “fully and seamlessly implemented.”
Kini human ang kagamhanan sa Lalawigan sa Sugbo, miluwat ug kaugalingong palisiya sa mga mangabot nga Overseas Filipino Workers (OFWs) ug returning overseas Filipinos (ROFs) diha sa MCIA.
Ubos sa palisiya sa Sugbo, ang mga travelers tugtan nga maka lahos sa local nga ilang padulngan ug mamahimong mag home quarantine sa higayon nga mag negative ang ilang RT-PCR test.
Subli silang ipa ubos ug test sa ika-pito nga adlaw.
Samtang sa IATF nga rules, gikinahanglan nga ang mga incoming travelers, OFWs ug ROFs i quarantine ug 10 ka adlaw sa government facility quarantine ,human niini adto na mag quarantine sa balay sa ika 10th ngadto sa 14th day.
Sa ilang paghangop sa pagbalik sa international flights karon, Hunyo 13, matod ni Napuli nga sundon nila ang gipatuman nga local policy.
“Cebu is united to stick to what we believe is right,” mensahi ni Napuli.
Gitakda nga moabot ang usa ka Singapore flight karong alas 2 sa hapon ug laing flight gikan sa Korea karong alas 10 sa gabii.
Matag flight dunay sakay nga 150 ka mga pasahero.
Gipahibaw ni Napuli nga dunay 5,000 ka mga hotel rooms diin maka istar ang mga mangabot nga OFWs ug ROFs samtang magpa-abot sila sa resulta sa swab test sa airport.
Alang sa MCIA nga kini nagpasabot nga mas andam sila karon kumpara sa miagi.
Sa kasamtangan, nagka daghan nang mga senador ug mga kadagkuan sa Sugbo nga mipadayag ug suporta sa gipatuman nga lokal nga palisiya labot sa protocol sa mangabot nga OFWs ug ROFs. (Jhon Tadlip/JTY)
(News & photo courtesy of Mactan Cebu International Airport)