Gitawag nga “unfair” sa usa ka human rights group ang gihimong pagdepensa ni City Councilor, Atty. Jose Edmar Yumang sa gitudlong gunman sa pagpatay sa Brigada executive nga si Yen Quintoy.
Sa gi-post nga mensahe sa Facebook ni Sentro I-Defend chairman Benjamin Sumug-oy, gipanghingusgan niini nga “insulto” alang sa pamilya sa kapin 300 ka mga biktima sa pagpamusil sa siyudad ang maong pag-abugar ni Yumang sa suspek nga si Ralph Gerald Antoy Sorabia alias “Rap-Rap”.
Gatuo pa si Sumug-oy, nga mas dako ang matabang sa konsehal, isip Peace and Order Committee chairman sa Sangguniang Panlungsod, kung pagatutukan niini ang ginahimong imbestigasyon sa mga natala nga riding in tandem cases, inay, nga personal nga gunitan ang kaso sa respondent.
“Sa katapusan insulto sa pamilya sa mga sobra 300 nga gipatay, ug sa publiko usab nga ang Chairman sa Peace and Order sa SP mao hinuon ang mang abugar sa suspetsado sa riding-in-tandem killings,” ang tipik sa maong mensahe ni Sumug-oy.
Una na usab gitawag nga “unethical” ni City Councilor, Atty. Franklin Gacal ang maong pagpapel ni Yumang sa Quintoy slay case.
(File photo: Sentro-I-Defend, gikondina ang serye sa kamatay sa GenSan)