Mabilis na inaprubahan ng kamara ang mahigit P8B proposed budget ng Office of the President (OP) para sa susunod na taon.
Ito ay kaugnay ng naganap na budget deliberation ng House Appropriations Committee kung saan inabot lamang ng halos limang minuto ang naturang deliberasyon.
Ayon kay Committe Chairman Isidro Ungab, ang mabilis nilang pag-apruba sa bilyong pisong budget ng Office of the President ay maituturing na gesture of courtesy.
Aniya, hindi ito dapat masamain dahil mabilis rin naman na ina-aprubahan ng komite ang proposed budget ng Office of the Vice President.
Gayunman, sinabi naman ni Bayan Muna Partylist Representative Ferdinand Gaite na kuwestiyunable ang naturang proposed budget lalo na’t aabot sa P1.4B ang nakalaan para sa intell funds habang nasa P1 Billion naman ang para sa personnel services.
Kaugnay nito, sinabi naman ni Alliance of Concerned Teacher (ACT) Partylist Representative France Castro na ang intelligence fund na inilaan para sa OP ay maaring ilaan para sa karagdagang sahod ng mga guro at ayuda sa mga naghihirap na magsasaka.