Cagayan de Oro – Aprubado na sa konseho ning syudad ang balor P8.850 bilyones nga annual budget sa dakbayan sa Cagayan de Oro alang sa tuig 2025.
Kini human giaprobahan karong adlawa, Septiyembre 13 sa 20th City Council ang executive budget sa syudad atol sa budget deliberation sa konseho isip ‘committee of the whole’ nga gidumala ni Bise Mayor Jocelyn ‘Bebot’ Rodriguez ug gisalmotan sa nagkadaiyang buhatan ug departamento sa city hall.
Ang projected revenue sa Cagayan de Oro sunod tuig gilantaw nga moabot sa P7.6 bilyones alang sa general fund ug P1.2 bilyones alang sa Special Account-Local Economic Enterprises/Utilities.
Ang social services sector nga naglangkob sa health, nutrition, hospital services ug social services and welfare ang adunay pinadakong pahat sa 2025 annual budget nga mobalor sa P3.7 bilyones kon 41.89 porsiyento.
Kini gisundan sa general public sector nga adunay gahin nga P2.8 bilyones o’ 31.71 porsiyento, diin gipunting ang mga proyekto ug programa sa public safety and order sa syudad.
Samtang P2.3 bilyones kon 26.40 porsiyento usab ang gigahin alang sa economic services sector nga naglangkob sa infrastructure, agricultural services, environmental and natural resources ug operasyon sa kamerkadohan.
News and photo by CIO CDO