Iriga City — Nagpatanid ngunian si P/Col. Roderico Roy, an pamayo kan PNP Cam.Sur sa mga nagpapatupada sa tahaw kan higot na protocol na ipinapasunod huli sa pandemya.
Ini an sinabi kan opisyal matapos na mahagadan nin reaksyon kan Radyo Ronda an provincial director katakod kan dai mapondong operasyon kan tupada sa parte kan masoli sa banwaan nin Bato asin iba pang parte kan Buhi na kontra sa pinagboboot kan IATF.
Sigun sa opisyal, tulos niyang aapudan an COP kan Bato tanganing hagadan nin magkakanigong report kasabay kan pagsabi na tulos-tulos na magibo nin aksyon an policia nganing mapapondo an nasabing pa-bulang.
Inot kaini, nagluwas sa mga bareta na sarong taga Bureau of Fire Protection asin sarong taga-kapitolyo an maintainer kan nasabing patupada sa sarong farm sa may parte kan Masoli sa banwaan nin Bato, Camarines Sur.
Sa may parte man kan Buhi, mismo an PNP-Buhi an nag-ako na talagang may mga nagpoprobar sa pagpapatupada sa sinambit ng banwaan maski magkapira ng personas an saindang nadakop asin kinasuhan.
(OIC Melvin F. Barayoga, RPN DZKI Iriga)
(Source: PNP Camarines Sur)