Cebu City – Gihunong una sa kagamhanan sa Dumanjug, Cebu ang operasyon sa ilang RHU o Rural Health Unit human magpositibo sa coronavirus disease o Covid-19 ang unom niini ka sakop.
Mao kini gipahibawo sa kagamhanang local sa mga sakop sa media kagahapon.
Sa nasayran, tulo ang uwahing nataptan sa virus sa Dumanjug sa miaging semana.
Ug sa tinguha nga malikayan ang pagpanakod sa kagaw, gihangyo ni Dr. Josefina Malana si Mayor Efren Gungun Gica pagpahigayon og disinfection sa pasilidad sa RHU ug sa Emergency Rescue Team (ERT).
Subay niini, gimando sa mayor ang pagpaubos sa mga kawani sa RHU sa swab test.
Una niini, tulo ka kawani sa RHU ang unang gi-covid pero nadugangan og tulo.
Ang ubang sakop sa RHU di pa makabalik sa trabaho hangtod di pa mahuman ang 14 ka adlaw nga quarantine.
Ubos sa lagda sa DOH o Department of Health, kinahanglan ipaubos pag-usab sa swab test ang mga kawani sa di pa makabalik sa trabaho.
Matod sa municipal health officer, kutob sa Agosto 31 nga serado ang RHU. (Jhon Tadlip/ JTY)
(Source: Dumanjug Public Information Office)