Naibunong ti naruay a makinaria ken kagamitan a pagtalon kadagiti nadumaduma nga organisasyon ditoy probinsia iti Ilocos Norte Centennial Arena.
Segun ken ni Mr. Edwin Carino, mangidadaulo ti Sustainable Development Center wenno SDC, maibilang ditoy dagiti walo a four wheel drive tractor innem a harvester ken maysa a rice trans planter.
Imbatadna a paset daytoy iti kalikagum ni Gob. Matthew Marcos Manotoc ken ti sibubukel a gobierno probinsial a matulungan dagiti mannalon a mangpalag-an iti panagtalon dagitoy ken pangsulbar kadagiti problema iti kaawan maala a matangdanan nga agtrabaho iti kataltalonan.
Inpaayna nga ehemplo ti “Rice Trans Planter “ a dakkel a tulong gapu ta awanen ti maala pay a matangdanan nga agraep gapu ta kaykayaten dagiti kakailian ti mapan agtrabaho iti konstruction.
Inlawlawagna a sangapulo ket lima nga organisasyon dagiti mannalon manipud iti nadumaduma nga ili ken siudad ti nabenipisiaran.
Inbunannagna a nupay dandanin agngudo ti tawen 2020 ket adda pay laeng dagiti manamnama a maibunong pay a makinaria ken kagamitan a para kadagiti mannalon.
Kabayatanna na inpakaammona a maisaruno a dagus ti pannakaisayangkat ti training para kadagiti benepisiario no kasano ti pannakausar dagiti naiyawat kadakuada a kagamitan.
Inayonna a kiniddaw dagiti maseknan a mannalon a maiyuswat ti nasao a training iti umuna a paset ti tawen 2020. (Irene Ringor, RPN DZRL Batac Correspondent)
(Source: Provincial Government of Ilocos Norte)