Umab-abot iti pitopulo agingga iti siam a pulo a porsiento ti nagbiag kadagupan dagiti nadumaduma a kaykayo nga inmula ti gobierno probinsial babaen iti panangidaulo ti Environment and Natural Resources Office wenno ENRO.
Siraragsak ni Mr. Hashler Garalde ti ENRO a nangibunannag a daytoy ti mangipamatmat a nangato ti bilang dagiti nagbiag kadagiti naimula a kaykayo.
Kunana a dakkel ti naitulong dagiti innala ti gobierno probinsial a barangay ranger officers a mangbantay kadagiti “greening program” ti probinsia.
Malaksid iti daytoy, impannakkelna nga adda dagiti usaren ti probinsia a pangmantener kadagiti nasao a proyekto uray iti panawen ti kalgaw.
Impalgakna nga adda dagiti nakaplastar a “hose” a mausar a pangpadanum kadagiti naimula a napatubo wenno dagiti napagamutan a kaykayo pakairamanan dagiti “high value crops” kas iti kape ken rambutan.
Imbatadna a kadagiti immuna a nagmula kadagiti napagamutan a mangga ket nangrugin dagitoy a nagapit iti bunga dagiti inmulada.
Innayonna nga adda payen ti kiddaw dagitoy a mangipalawa iti minulaanda.
(Cita Macalipis, RPN DZRL Batac Correspondent)
(Source: Provincial Government of Ilocos Norte)