CAGAYAN DE ORO CITY – Alayon sa state of the Nation o Sona karong adlawa, gusto ni City Mayor Oscar Moreno nga madunggan gikan kang Presidente Rodrigo Duterte ang komprehensibong solusyon sa krisis nga gihatud sa coronavirus disease sa nasud. Nagtuo ang mayor nga higayon na kini sa president nga mapaabot sa katawhan ang direkta nga hangyo nga tabangan ang pagpakig-away batok sa bayrus.
Sa pikas bahin, mihatag sa 50-50 nga inisyal nga grado ang pipila ka transport group sa nahimong performance ni Duterte sa pagdumala sa nasud, kabahin ni Joel Gabatan, regional coordinator sa National Confederation Transport Union nga sila ang nahimong alaut sa programa sa pamuno-nasud kabahin sa modernization sa mga public utility jeepney. Malaumon usab sila nga masukip sa report ni Pres. Duterte karong adlawa ang mahimong kahimtang sa transport sector pag-abot sa tuig 2021. Sa padayon paghimulso sa katawhan, wala pay mahatag nga grado ang grupo sa mamumuo sa region 10 sa kinatibuk-ang programa sa administrasyon. Sa pamahayag nga giluwatan ni ALU-TUCP regional vice-president Atty. Proculo Sarmen, siya miingon nga maayo ang performance ni Pres. Duterte sa pakigbatok kriminalidad ug korapsyon apan matud niya, pakyas kini pagsulbal sa problema sa panarbaho sa nasud sama na lang sa pagpadayon sa contractualization.
Sa uban pang sector sama sa Motorcycle Riders sa rehiyon, halos perpekto nga grado ang ilang gihatag sa pamunuan karon, kini bisan pa nga wala sila mahimoot sa kamanduan sa IATF sa pagbutang sa anti-laway shiel o barrier sa mga motrosiklo bisan pa kon magtiayon ang sakay. Matud pa ni Jun Tupag, convenor sa Motorcyle Riders CdeO Chapter nga gusto nilang mabati sa SONA ni President Duterte karong adlawa ang mahitungod sa pagbackride sa motorsiklo.
Sa pikas bahin, gihagit sa Citizens Watch for Good Governnance ang mga sector sa katilingban nga dili lamang kutob sa pagpanaway sa mga Lideres sa nasud ang angay buhaton niini.
Matud ni Atty. Antonio Soriano, convenor sa grupo nga angay tabangan sa tanan ang president aron mas mahimong gaan pagsulbad sa mga suliran sama sa krisis nga gihatud sa coronavirus disease sa nasud. (Gin B. Serohijos)