Cebu City- Miabot og 6,112 ang gidaghanon sa mga tawo nga nadakpan sa kapolisan sa dakbayan sa Sugbo tungod sa paglapas sa protocol ubos sa ECQ o enhanced community quarantine sukad sa pagpatuman niini niadtong Marso 16.
Pinaagi sa video conference, si Col. Josefino Ligan, pangu sa CCPO, mipahibawo sa mga taga media nga ang uban sa ilang dinakpan igo lang gipasidan-an ug ang ubang gipangkeha.
Matod ni Ligan, ilang gitambagan ang mga dinakpan nga kinahanglang magsul-ob na silag facemask, magtamod sa social distancing ug maghupot gyod og quarantine pass.
Ang mga dinakpan, sumala pa niya, ilang gipahimo og community service ug gipasabot sa kahinungdanon sa pagpabilin sa balay panahon sa pandemic ug unya gipapauli.
Pero naay 401 ka individual nga gipamulta og gikan sa usa ka libo ngadto sa 6 mil pesos agad sa violation.
Sa pikas bahin, aduna usay 2,259 ka malapason sa ECQ nga gikeha og violation sa ECQ protocols ug disobedience ubos sa Bayanihan Act of 2020.
Ang posibleng atubangong silot sa naasoyng mga dinakpan mao ang duha ka buwan nga pagkabilanggo o multa nga dili mokubos sa 10 mil pesos kon himatud-ang wala motahod sa mga lagda sa nasodnong gobyerno nga nag-imponer og kwarantina.