Manamnama a maaddaan ti Mariano Marcos Memorial Hospital and Medical Center a bukod a PCR wenno “ Polymerase Chain Reaction” machine iti mabiit.
Segun ken ni Gob. Matthew Marcos Manotoc tumulong ti Gobierno Probinsial iti pannakagatang ti nadakamat a kagamitan.
Kunana nga importante a maaddaan ti Probinsia ti PCR machine kas paset ti panagsagsagana iti pannakaipatungpal ti General Community Quarantine iti Ilocos Norte.
Inlawlawag a manamnama a mapasangpet ti Probinsia ti baro a machine iti unegti sumagmamano alawas ta napirmaan metten ti “Purchase Request” para iti pannakagatang ti nasao a kagamitan.
Nupay kasta impalgak ti gobernador nga indiaya ti kompania a panggatangan ti probinsia iti nadakamat a kagamitan iti panangipabulodda iti MMMHMC ti ususarenda a para iti demonstrasyon nga adda idiay St. Lukes Medical Center.
Mainaig iti daytoy, mangnamnama ni Gob.Matthew Marcos Manotoc a babaen iti daytoy ket maikkan ti gundaway dagiti agpapaay iti MMMHMC a mangasa a naimbag iti laingda a mangusar iti nadakamat a makina apaman a maisangpet ti nasao a PCR machine.
Immun-una ngem iti daytoy inpakaamo ni Dr. Ma Lourdes Otayza, Medical Chief II ti MMMHMC nga adda dagiti nasanay ken nakasagana a mangoperar iti nasao a kagamitan nga agserbi iti Hospital.
Innayon na nga adda metten ti naipasdek a kuarto a para iti PEC Machine a nairanta a pakaamirisan dagiti “Swab test “ kadagiti pasiente it COVID-19.