Samtang nagkataas ang nataptan sa Corona Virus Disease (Covid-19) sa mga person deprived of liberty (PDL) sa silingan nga siyudad ang Misamis Oriental Provincial Jail and Rehabilitation Center (MOPJ) pabiling zero sa makamatay nga virus.
Kini gumikan sa mas hugot nga seguridad nga gipatuman sulod sa prisuhan nga nahisubay sa mandato ni Governor Bambi Emano ug Provincial Task Force Chief Dr. Jerie Calingasan sugod palang sa sinugdan sa pakigbatok sa Covid-19.
Sa giya ug hugot nga implementasyon sa pagpatuman sa mga seguridad ni Provincial Warden Dominador Tagarda milampos ang MOPJ nga dili masudlan sa virus ang bilanggoan hangtud karon panahona.
Matud sa Provincial Warden nga bag-ohay lang usa ka inisyatiba ang gihimo sa ilang buhatan arun mapanalipdan ang priso ug tanan mga butang o pagkaon alang sa mga detainees nga gikan sa gawas kinahanglan isulat una sa usa ka form una makasulod sa nasampit nga bilanggoan.
Gipasabot ni Warden Tagarda nga kadtong mga tagtungod nga buot maghatod og pagkaon o gamit alang sa ilang piniriso diha lang usa taman gawas sa entrance gate tungod kay naka lockdown pa usab ang bilanggoan apan dili una dawaton ang dala kong dili maka sulat sa receipt form o naka itemized ang tanan bitbit para sa ilang piniriso.
Ihatag dayon kini sa naka duty nga Jail officer ang nasampit nga receipt form ngadto sa ila, i-fill-up usa dawaton ang dala nga mga pagkaon o gamit.
Gawas niini dili modawat ug bag-o nga PDL ang MOPJ kon walay resulta sa swab test nga nagnegatibo kini sa virus.
Suportado ni Gobernador Bambi Emano kini nga laing lakang sa MOPJ kon tumong niini mapanalipdan sa virus ang mga binilanggo, una na nga gisulti sa amahan sa lalawigan nga ikagoul niya kon isa sa priso ang mataptan gumikan kay posibleng magtakod gyud sulod sa bilanggoan hinungdan una pa lang gipatuman na ang E-dalaw kon asa mahinabi sa ilang mga pamilya ang priso pinaagi sa virtual ug lakip ang pagdungog sa kaso nga agi gihapon sa online aron malikayan ang face to face.
Sa pamunoan ni Gobernador Bambi dayag nga protektado ang bisan unsa nga hut-ong sa katilingban kay alang niini kaluwasan sa Misamisnon ang labing unang prayoridad sa iyang pamunoan. (MisOr – Provincial Information Office)